KONJIGEZON I
M aprann foli m
nan vant manman m
tankou boul san nan vè lèt
m aprann detenn
sou chak santimèt kib
kesyonman
rezonman
m aprann danse pasyon m
depi lè m te fil
nan je zegwi
mwen jwe demen m
nan yon kwazman foli
se depi m te dechay
mwen pote chay foli m
KONJIGEZON II
M aprann foli m
nan aprann lanmou
nan chita
pote dèy pou paradi
m aprann foli m
nan bay solèy pou solèy
souri pou souri
foli pou foli
se nan limen dife
mwen konnen li konn chofe
li konn boule
mwen te gen tan fou
anvan foli m
m aprann lafoli m
nan bati demen
ak zenglen lanmou
ki blayi nan rèv mwen
KONJIGEZON III
M aprann lafoli m
nan diskou pwofesè
lamoral
k ap refoule diskou
lanwit
pou diskou enpote
plen fot
moral
m aprann lafoli m
nan ensètitid
je ak zorèy mwen
ki tounen
bann a.m f.m
kamera tele
klavye odinate
lank sou papye jounal
mwen aprann lafoli m
kou 27yèm lèt
alfabè franse